महाराष्ट्रातील प्रमुख मंदिरे

त्र्यंबकेश्वर (नाशिक) हे गोदावरी नदीचे उगमस्थान असून येथे ब्रह्मा, विष्णू आणि महेश (शिव) यांचे प्रतिनिधित्व करणारे त्रिमुखी लिंग आहे.

भीमाशंकर (पुणे) येथून भीमा नदी उगम पावते. येथील वनक्षेत्र महाराष्ट्राचा राज्य प्राणी शेकरू (विशाल खार) साठी वन्यजीव अभयारण्य म्हणून प्रसिद्ध आहे.

घृष्णेश्वर ज्योतिर्लिंग मंदिराचा जिर्णोद्धार छत्रपती शिवाजी महाराजांचे आजोबा मालोजीराजे भोसले यांनी केला, तर १८ व्या शतकात इंदूरच्या राणी अहिल्याबाई होळकर यांनी मंदिराचा पुनर्निर्माण केला.

महाराष्ट्रातील साडेतीन शक्तीपीठे म्हणजे तुळजापूरची तुळजाभवानी, कोल्हापूरची महालक्ष्मी, माहूरची रेणुकादेवी आणि वणीची सप्तश्रृंगी.

अष्टविनायक यात्रेत ८ स्वयंभू गणपती मंदिरांचा समावेश आहे, ज्यापैकी ५ पुणे जिल्ह्यात, २ रायगड जिल्ह्यात आणि १ अहिल्यानगर (सिद्धटेक) जिल्ह्यात आहे.

पंढरपूरचे विठ्ठल रुक्मिणी मंदिर भीमा नदीच्या तीरावर वसलेले आहे, नदीच्या अर्धचंद्राकार पात्रामुळे येथे तिला चंद्रभागा असे म्हटले जाते.